Janë bërë gati 7 muaj nga vrasja makabre e Bekim Varit, 37-vjeçarit nga Ferizaj.
Vari i cili u varros 6 javë pas vrasjes mizore që tronditi gjithë opinionin, u gjet i groposur në një zonë të pyllëzuar në fshatin Manastirc.
Për këtë akt tronditës, në paraburgim ndodhet Leutrim Fejza, i cili po përballet me akuzën për “Vrasje të rëndë”, sipas nenit 173 të Kodit penal të Kosovës.
Burime bëjnë me dije se derisa hetimet po vazhdojnë, prokuroria ka intervistuar nënën e Bekim Varit.
Nëna e Bekimit ka dhënë dëshminë e saj, duke treguar për momentet e fundit që kishte me të birin.
Dyshimet e para në këtë fazë të hetimeve janë që Fejza këtë akt mizor e ka kryer në bashkëpunim me persona të tjerë.
Pas këtyre dyshimeve, prokuroria ka kërkuar nga Njësia e Kibernetikës detaje rreth dërgimit të mesazheve të Fejzës me persona të tjerë.
Sipas prokurorisë, besohet se vrasja ka ndodhur më 23 janar, ndërsa trupi i tij u gropos në një zonë të largët për të fshehur gjurmët e krimit, për të cilën ka dyshime se janë përfshirë disa persona.
Ndonëse po bëhën gati 7 muaj nga ky akt tronditës, prokuroria ende nuk ka ngritur një aktakuzë për këtë rast.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
