Besnik Osmani, një nga figurat e njohura të Lidhjes Demokratike të Kosovës, ka hyrë në garën zgjedhore për kryetar të Komunës së Fushë Kosovës me numrin 113. Me një përvojë të gjatë në jetën publike dhe institucionale, Osmani synon t’i ofrojë qytetarëve udhëheqje të përgjegjshme dhe zhvillim të qëndrueshëm.
Gjatë prezantimit të tij, ai ka theksuar se prioritetet kryesore do të jenë përmirësimi i infrastrukturës, hapja e mundësive të reja për të rinjtë, rritja e transparencës në qeverisjen lokale dhe krijimi i kushteve më të mira për bizneset vendore.
Osmani, i cili ka shërbyer edhe si nënkryetar i Komunës së Fushë Kosovës, beson se përvoja e tij do të shërbejë si garanci për një qeverisje më efikase dhe afër qytetarëve. “Fushë Kosova ka nevojë për energji të re, për vendime të guximshme dhe për udhëheqje që i sheh qytetarët si partnerë. Së bashku mund ta bëjmë komunën tonë një vend më të mirë për të jetuar dhe për të punuar,” ka deklaruar ai.
Me përkrahjen e Lidhjes Demokratike të Kosovës, Besnik Osmani synon ta rikthejë besimin e qytetarëve në institucione dhe të hapë një kapitull të ri për komunën, duke u fokusuar në zhvillim ekonomik, arsim cilësor dhe shërbime më të mira publike.
