Personeli dhe pajisjet ushtarake të Mbretërisë së Bashkuar po dërgohen në Belgjikë për ta ndihmuar atë të forcojë mbrojtjen e saj pas ndërhyrjeve me dronë në hapësirën e saj ajrore, të dyshuara se janë kryer nga Rusia.
Kreu i ri i ushtrisë britanike, Sir Richard Knighton, i tha emisionit të BBC-së “Sunday with Laura Kuenssberg” se homologu i tij belg kërkoi ndihmë në fillim të kësaj jave dhe se pajisjet dhe personeli ishin duke ardhur.
Aeroporti kryesor i Belgjikës, Zavantem, u detyrua të mbyllej përkohësisht të enjten në mbrëmje pasi u panë dronë aty pranë . Ato u panë edhe në vende të tjera, përfshirë një bazë ushtarake.
Sir Richard tha se nuk dihet nëse ndërhyrjet ishin nga Rusia, por shtoi se ishte “e besueshme” që ato të ishin urdhëruar nga Moska.
Krahas aleatëve të NATO-s, ai shtoi se Mbretëria e Bashkuar do ta ndihmonte Belgjikën “duke ofruar pajisjet dhe kapacitetet tona”, të cilat ai tha se tashmë po dislokoheshin. Të premten, ministria gjermane e mbrojtjes tha se do ta mbështeste Belgjikën me masa kundër dronëve pas një kërkese nga Brukseli.
Në muajt e fundit, një numër pamjesh të dronëve kanë shkaktuar ndërprerje të mëdha të fluturimeve në të gjithë Evropën, përfshirë Suedinë, Norvegjinë dhe Danimarkën.
