Këngëtarja e njohur shqiptare, Dafina Zeqiri, ka reaguar publikisht pas qarkullimit të disa videove në rrjetet sociale, ku shihen banoret e Big Brother VIP Kosova 4, Benita Zena dhe Alba Pollozhani, teksa intimidojnë dhe bullizojnë banoren më të re të shtëpisë, Elijona Binakajn.
Pamjet, të cilat kanë ngjallur reagime të shumta nga publiku, kanë vënë në qendër të diskutimit mënyrën si trajtohen pjesëmarrësit brenda formatit, sidomos rastet ku sjelljet agresive shihen si pjesë e “argëtimit”.
Dafina, e cila shpesh ka shprehur qëndrime të forta kundër dhunës dhe bullizimit, këtë herë u shpreh tejet e indinjuar. Në një koment të lënë në rrjetet sociale, ajo shkroi: “Është e tmerrshme që Big Brother lejohet ende me ekzistu! Kur bullizimin, dhunën fizike dhe psikike e shfaqin si argëtim. TV duhej me qenë i sigurt për fëmije, jo me normalizu dhunë. Ku po shkon ky vend që këtë lejon vit pas viti?”
Foto: Dafina Zeqiri/Instagram
Reagimi i saj mori dhjetëra pëlqime dhe u shpërnda gjerësisht nga ndjekësit. Këngëtarja nuk u ndal me kaq. E pyetur nga një fans se pse institucionet nuk veprojnë, ajo shtoi edhe një koment tjetër kritik ndaj autoriteteve: “Po më duket kot flasim kur kryesorët e shtetit nuk marrin masa. Besoj që i shohin reagimet e të gjithëve po?”.
Reagimi i Dafinës ka hapur edhe një herë debatin për rolin e televizioneve në normalizimin e sjelljeve agresive, si dhe për përgjegjësinë që mbajnë platformat mediale dhe institucionet shtetërore në mbrojtjen e të rinjve dhe standardeve etike.
Big Brother VIP Kosova ende nuk ka dhënë një reagim zyrtar lidhur me kritikat e fundit.
