Një rast i rëndë është raportuar të dielën në Fushë Kosovë, ku një person i gjinisë femërore është gjetur pa shenja jete në një shtëpi të pabanuar.
Sipas burimeve të besueshme, rasti është raportuar më 18.01.2026, rreth orës 11:00, në rrugën “Selim Grajqevci” në Fushë Kosovë.
Menjëherë pas pranimit të informatës, në vendngjarje kanë dalë njësitë përkatëse të Stacionit Policor Fushë Kosovë, NJHR, si dhe Forenzika Rajonale, për të trajtuar rastin dhe për të kryer veprimet e nevojshme.
Në vendin e ngjarjes ka dalë edhe autoambulanca e QMF-Bresje, ku mjeku kujdestar ka konstatuar vdekjen, ndërsa sipas vlerësimit fillestar nuk janë vërejtur shenja dhune në trupin e viktimës.
Lidhur me rastin është njoftuar Prokurori i Shtetit nga Departamenti i Krimeve të Rënda, i cili ka udhëzuar që të iniciohet rasti “Hetim mbi vdekjen”, ndërsa trupi i pajetë i viktimës të dërgohet për ekzaminim mjeko-ligjor.
Rasti po vazhdon të trajtohet nga Stacioni Policor në Fushë Kosovë, ndërsa hetimet janë në zhvillim.
