Një studim i ri tregon se konsumimi i lartë i alkoolit gjatë jetës lidhet me rritje të ndjeshme të rrezikut për kancer të zorrës së trashë dhe rektumit.
Sipas studiuesve, personat që konsumojnë 14 ose më shumë pije alkoolike në javë gjatë jetës kanë rrezik më të lartë për zhvillimin e kancerit kolorektal, krahasuar me ata që pinë pak ose aspak alkool. Studimi përfshiu mbi 88 mijë persona të ndjekur për disa vjet, gjatë të cilave u regjistruan 1,679 raste të kancerit kolorektal.
Rezultatet tregojnë se konsumatorët e rregullt të alkoolit kishin 25 për qind më shumë rrezik për kancer të zorrës së trashë dhe 95 për qind më shumë rrezik për kancer të rektumit. Rreziku ishte edhe më i lartë te personat që kishin konsumuar sasi të mëdha alkooli në mënyrë të vazhdueshme gjatë moshës adulte.
Nga ana tjetër, studimi sugjeron se ndërprerja e konsumit të alkoolit ul rrezikun, pasi personat që kishin hequr dorë nga alkooli kishin më pak gjasa të zhvillonin polipe parakanceroze në zorrë.
Studiuesit theksojnë se nevojiten hulumtime të tjera për të kuptuar më mirë mekanizmat përmes të cilëve alkooli ndikon në zhvillimin e kancerit të zorrës së trashë.
