Me ardhjen e muajit të shenjtë të Ramazanit, në shumë familje shqiptare rikthehet një traditë e hershme: përgatitja e hallvës. Kjo ëmbëlsirë e thjeshtë, por me domethënie të veçantë, konsiderohet simbol i begatisë, mikpritjes dhe fillimit të mbarë të agjërimit.
Shumë amvisa zgjedhin ta përgatisin hallvën ditën e parë të Ramazanit, për ta shtruar në sofrën e iftarit të parë, duke “ëmbëlsuar” kështu muajin e shenjtë. Në disa familje të tjera, ajo gatuhet një ditë para nisjes së agjërimit, në mënyrë që të jetë gati me kohë dhe të ruajë traditën e trashëguar ndër breza.
Edhe pse nuk ka ndonjë rregull fetar që e përcakton saktësisht kohën e përgatitjes, hallva mbetet pjesë e rëndësishme e kulturës sonë gjatë Ramazanit. Aroma e saj që përhapet në shtëpi, bashkon familjen rreth sofrës dhe rikthen kujtime nga fëmijëria, kur gjyshet e nënat kujdeseshin që çdo detaj të ishte i veçantë.
Në Kosovë dhe në trevat shqiptare, kjo traditë vazhdon të ruhet me përkushtim. Për shumëkënd, hallva nuk është thjesht një ëmbëlsirë – është një ritual i vogël familjar që shënon fillimin e një muaji reflektimi, përkushtimi dhe solidariteti.
Në fund, pavarësisht nëse përgatitet një ditë më herët apo në ditën e parë të Ramazanit, rëndësi ka që tradita të vazhdojë dhe sofrat të mbeten të mbushura me dashuri dhe harmoni.
