Shumica prej nesh e dimë sa i rëndësishëm është gjumi për të mbajtur mendjen dhe trupin në gjendje të mirë.
Sipas Shërbimit Shëndetësor Kombëtar britanik, NHS, përfitimet e gjumit të mirë për shëndetin mendor përfshijnë uljen e stresit dhe përmirësimin e humorit.
Një gjumë cilësor është gjithashtu i rëndësishëm për funksionet e trupit dhe forcon sistemin imunitar.
Megjithatë, jo gjithmonë është e lehtë të bësh një gjumë të mirë gjatë natës. Disa persona që kanë probleme me gjumin mund të mos e kuptojnë se dieta e tyre mund të jetë shkaku. Për shembull, kafeina mund të prishë gjumin.
Sipas NHS:
“Kafeina është një stimulues, që do të thotë se ju bën të ndiheni më zgjuar. Por ajo gjithashtu mund të prishë ritmin normal të gjumit, duke çuar në vështirësi për të fjetur dhe më pas lodhje gjatë ditës”.
Kafeina gjendet shpesh në kafe, çaj, pije të gazuara dhe pije energjike.
Duke qenë se efektet e kafeinës mund të zgjasin deri në shtatë orë, NHS këshillon që ajo të shmanget në mbrëmje nëse keni probleme me gjumin. Disa persona mund të zgjedhin ta shmangin edhe pasditeve, sipas raportimit të Mirror.
Ekspertët e Royal College of Psychiatrists rekomandojnë ndjekjen e “rregullit të orës 14:00” për të përmirësuar cilësinë e gjumit. Në faqen e tyre thuhet:
“Ndaloni së piri çaj, kafe ose çdo pije tjetër me kafeinë pas orës 14:00. Nëse dëshironi një pije të ngrohtë në mbrëmje, provoni diçka me qumësht ose çaj bimor pa kafeinë”.
Pirja e alkoolit para gjumit gjithashtu mund të ndikojë negativisht. Sipas NHS, alkooli mund t’ju pengojë të flini thellë.
Për ata që duan të ndryshojnë rutinën e tyre, Royal College of Psychiatrists këshillon mbajtjen e një orari të rregullt për fjetje dhe zgjim, si dhe krijimin e një rutine çlodhëse para gjumit.
“Është normale që mendja jonë të bëhet shumë aktive sapo shtrihemi në shtrat. Për shumë prej nesh, kjo është hera e parë gjatë ditës kur jemi vetëm me mendimet tona. Prandaj nuk është çudi që truri bëhet shumë aktiv kur fikim dritat.
Për ta parandaluar këtë, ndani 30 minuta deri në disa orë para gjumit kur nuk punoni, nuk studioni dhe nuk bëni aktivitete që ju ngarkojnë mendërisht. Përdoreni këtë kohë për t’u çlodhur dhe për të përpunuar mendimet për atë që ka ndodhur gjatë ditës. Nëse është e mundur, lini telefonin jashtë dhomës para se të flini.”
Këshilla të tjera nga ekspertët përfshijnë bërjen e një dushi të ngrohtë para gjumit dhe shkrimin e shqetësimeve ose detyrave për ditën tjetër.
