Albian Hajdari mund të rikthehet në përballjen e Hoffenheimit këtë fundjavë, vetëm pak ditë pas lëndimit të pësuar në kokë gjatë kualifikueseve për Kupën e Botës me Kombëtaren e Kosovës.
Hoffenheim do të mund të llogarisë në dy përfaqësuesit kosovarë, Hajdarin dhe Leon Avdullahun, për ndeshjen e së shtunës në shtëpi ndaj Mainz 05 në Bundesliga. Të dy janë opsione për listën e ndeshjes, ka theksuar trajneri i TSG-së, Christian Ilzer.
Hajdari pësoi një prerje mbi vesh në humbjen 1-0 ndaj Turqisë, që sipas Ilzerit kërkoi 16 qepje. Ndërkohë, Avdullahu, i cili mungoi për shkak të një lëndimi në aduktor gjatë kualifikuesve, është gjithashtu shumë afër rikthimit.
“Natyrisht, tabela bëhet edhe më e rëndësishme me çdo ndeshje. Tani është faza finale, tani është momenti për të korrur frytet”, deklaroi Ilzer.
Pas vetëm një fitoreje në pesë ndeshjet e fundit, Hoffenheimi ka rënë në vendin e pestë. Pika më e ulët ishte humbja e thellë 0-5 ndaj RB Leipzig para pauzës ndërkombëtare.
“Në fillim të sezonit ishim një nga skuadrat më efikase. Aktualisht jemi ndër më pak efikaset”, ka shtuar trajneri i Hoffenheimit, skuadra e të cilit ka kohën neto më të ulët të lojës në Bundesliga këtë sezon, sipas Kicker.
Koha mesatare neto e lojës është 53 minuta e 41 sekonda, por Ilzer theksoi se mbajtja e kësaj kohe të ulët “nuk është një qasje taktike e Hoffenheimit”.
“Varet nga kundërshtari, intensiteti ynë i lartë dhe fakti që kundërshtarët marrin herë pas here pushime gjatë lojës”, sqaroi ai.
