Ylli muzikor Beyonce është paditur nën arsyetimin se ka përdorur pjesë muzikore të paautorizuar në hitin e saj “Alien Superstar”, siç bën të ditur TMZ.
Sipas dokumenteve gjyqësore, një kompani e quajtur Hirose Enterprise dhe një producent me emrin Shuji Hirose po padisin Beyonce dhe disa kompani muzikore për shkelje të të drejtave të autorit.
Hirose pretendon se zotëron të drejtat e një kënge të titulluar “Moonraker”, të interpretuar nga muzikanti John Holiday. Kompania thotë se Beyonce ka përdorur pjesën hyrëse të këngës në këngën e saj “Alien Superstar”, e cila u publikua në albumin e vitit 2022, Renaissance.
Sipas paditësve Beyonce dhe ekipi i saj nuk kishin marrë fare licencë për përdorimin e muzikës së tyre para publikimit të albumit, por morën një licencë disa javë pas publikimit.
Hirose thotë se e kishte njoftuar kompaninë e Beyonces për shkeljen e të drejtave autoriale, por se ajo ka vazhduar ta shesë albumin. Kompania po kërkon një urdhër gjykate që ta ndalojë Beyoncen të vazhdojë të përfitojë financiarisht nga vepra e tyre, si edhe dëmshpërblim prej një shume të pacaktuar.
Deri më tani nuk ka ndonjë reagim nga vetë këngëtarja.
