Pas një mbledhjeje maratonike që zgjati mbi pesë orë me drejtuesit kryesorë të partisë, kryetari i LDK-së, Lumir Abdixhiku, doli me një deklaratë lidhur me rezultatin e dobët të LDK-së në zgjedhjet e 28 dhjetorit.
Abdixhiku bëri të ditur se LDK-ja ka vendosur të thërrasë fillimisht Kryesinë dhe më pas Kuvendin e partisë, duke shtuar se do ta marrë përgjegjësinë politike përmes dorëheqjes së ofruar para Kuvendit të LDK-së, i cili tha se më pas do të vendosë për hapat e radhës.
“Siç ju kam njoftu në datën 28 dhjetor 2025, edhe sonte ju njoftoj se kemi vendosur të thërrasim fillimisht Kryesinë dhe më pas Kuvendin e LDK-së. E kam obligim moral të marrë përgjegjësinë dhe, nëpërmjet ofrimit të dorëheqjes te Kuvendi i LDK-së, të lë që pastaj të vendosë Kuvendi. Deri atëherë, secili ka të drejtë të shtrojë kandidaturën. Ky ishte takim joformal i kryetarit të LDK-së me bashkëpunëtorët e LDK-së. Takimi formal do të ndodhë javën e ardhshme.” – tha Abdixhiku.
