Mesfushori kosovar i Zurichut, Valon Berisha, përjetoi një tragjedi personale në Austri këtë fundjavë, pasi kushëriri i tij vdiq në një aksident të rëndë në autostradën perëndimore.
Një kosovar me pasaportë zvicerane, 38-vjeç, nga Rothrist në kantonin e Aargaut, humbi jetën të dielën në mëngjes gjatë drejtimit të një furgoni në Westautobahn, rreth orës 08:10. Automjeti doli nga rruga pranë stacionit të shërbimit Lindach pranë Laakirchen dhe përplasi ballë për ballë një barrierë zhurme prej druri. Sipas gazetës “Krone”, shpëtimi ishte i pamundur për shkak të deformimit masiv të mjetit.
Valon Berisha po ngiste makinën direkt përpara automjetit të aksidentuar dhe u bë dëshmitar okular i incidentit.
33-vjeçari u ndal menjëherë, vrapoi drejt vendngjarjes dhe bashkë me ndihmësit e shpejtë ofroi ndihmë emergjente, duke thirrur shërbimet e urgjencës. Megjithatë, përpjekjet për të shpëtuar kushëririn e tij nuk dhanë rezultat.
Në një deklaratë, FC Zürich shprehu ngushëllimet dhe mbështetjen për Berishën.
”
“FC Zürich është thellësisht i tronditur nga aksidenti tragjik në Austri, në të cilin u vra një i afërm i ngushtë i lojtarit tonë Valon Berisha. Valon nuk ishte i përfshirë direkt në aksident, por u bë dëshmitar i ngjarjes. Klubi qëndron pranë tij dhe e mbështet në çdo mënyrë në këtë kohë të vështirë.”
Valon Berisha sapo ishte transferuar nga LASK te FC Zürich gjatë merkatos së dimrit dhe të shtunën në mbrëmje zhvilloi paraqitjen e tij të parë si titullar në fitoren 2-1 ndaj Grasshoppers Zürich.
