Rastet e falsifikimit të parasë kanë shënuar sërish rritje dhe një dukuri e tillë po ngrit shqetësim për numrin e madh të kartëmonedhave dhe monedhave false që po futen pothuajse çdo ditë në qarkullim. Ky ‘trend’ i parave të falsifikuara që ka ‘lulëzuar’ në Kosovë për një kohë të gjatë, po vazhdon të jetë problem kryesisht për bankat që operojnë në vendin tonë.
Një rast i tillë ka ndodhur së fundmi në një bankë në Prizren, ku dyshohet se janë deponuar mbi 500 euro false.
Burimet e Sinjalit kanë bërë me dije se rasti ka ndodhur në ProCredit Bank, ku një punonjës i kësaj banke e ka raportuar rastin në Polici dhe ka dorëzuar 541.50 euro në kartëmonedha dhe monedha të dyshuara si të falsifikuara.
Ankuesi I dorëzuar në polici monedhat e dyshimta, të cilat ishin evidentuar gjatë procesit të punës në bankë. Shumat përbëheshin nga monedhat metalike 0.50, 1 dhe 2 euro, si dhe nga kartmonedhat 50 dhe 100 euro.
Pas dorëzimit të provave, njësitë policore kanë informuar hetuesin kujdestar, i cili në koordinim me Prokurorin e Shtetit ka urdhëruar inicimin e rastit dhe dërgimin e monedhave për ekzaminim të mëtejshëm.
Hetimet janë duke vazhduar dhe autoritetet po punojnë për të identifikuar personat e përfshirë në këtë rast.
Sinjali do t’iu mbajë të informuar për zhvillimet e këtij rasti.
