Tensionet që rrethojnë Lamine Yamal kanë marrë një kthesë të re, dhe Barcelona ka dalë publikisht për të mbrojtur veprimet e saj.
Pas tërheqjes së papritur të sulmuesit nga Kombëtarja e Spanjës, klubi thekson se ka vepruar me transparencë të plotë dhe në kohë, pasi i ka aplikuar lojtarit trajtim kundër pubalgjisë që e ka shqetësuar 18-vjeçarin prej disa javësh.
Burime të klubit, në deklarata për “EFE”, sqaruan se Barcelona është sjellë “në mënyrë të përgjegjshme dhe në koordinim me lojtarin dhe nevojat e tij mjekësore”, duke hedhur poshtë çdo sugjerim se procedura është kryer pa dijeninë e Federatës.
Sipas klubit, prioriteti ka qenë gjithmonë shërimi i plotë i Lamine-s dhe parandalimi i përkeqësimit të gjendjes së tij.
Reagimi i Barcelonës erdhi pasi Federata Mbretërore e Futbollit të Spanjës (RFEF) shprehu publikisht “habinë” dhe “pakënaqësinë” e saj për trajtimin me radiofrekuencë që iu aplikua lojtarit – një procedurë për të cilën Federata pretendon se nuk ishte njoftuar, përfshirë edhe periudhën e pushimit prej 7 deri në 10 ditësh. Barcelona e mohoi fuqishëm këtë version.
Sipas klubit, Lamine mbetet nën kujdesin e stafit mjekësor të Barcelonës, që është në kontakt të vazhdueshëm me kombëtaren.
Trajtimi është mbikëqyrur nga specialisti belg Ernest Schilders, një ekspert ndërkombëtar në pubalgji, i cili kishte planifikuar që më parë të vizitonte Ciutat Esportivan një ditë pas ndeshjes kundër Celtas.
Gjatë vlerësimit të përbashkët, Schilders dhe mjekët e klubit konstatuan se gjendja e lojtarit po përmirësohej, por kishte nevojë për një ndërhyrje të synuar për të përshpejtuar rikuperimin.
Kështu, u vendos të zbatohej trajtim me radiofrekuencë – një teknikë elektrike e kontrolluar që zvogëlon dhimbjen dhe nxit rigjenerimin e indeve. Barcelona pretendon se vendimi u komunikua menjëherë te RFEF.
Meqë procedura kërkon një periudhë të shkurtër pushimi, Lamine u përjashtua automatikisht nga ndeshjet e fundit kualifikuese të Spanjës për Botërorin 2026, kundër Gjeorgjisë në Tbilisi dhe Turqisë në Sevilje.
Kjo situatë ka rindezur tensionet e vjetra midis klubit dhe Federatës për mënyrën e menaxhimit të talenteve të rinj. Barcelona kërkon që rruga e saj mjekësore të respektohet, ndërsa RFEF kërkon më shumë koordinim dhe transparencë.
Në mes të kësaj përplasjeje, Lamine Yamal ndodhet në një pozitë të vështirë, pa qenë vetë pjesë e konfliktit.
Për momentin, fokusi i klubit mbetet te rikuperimi i tij, me pritshmëri që ai të kthehet në formë optimale pas pauzës ndërkombëtare, gati për të vazhduar sezonin ku tashmë është një nga figurat qendrore në planet e Hansi Flick.
