Barcelona shfaq interes për Edon Zhegrovën – Çmimi i tij fillestar, 30 milionë euro
Barcelona është gjithnjë në kërkim të talentit të ri për të forcuar skuadrën, dhe këtë herë vëmendja e tyre është drejtuar te ylli i Kosovës, Edon Zhegrova. Sipas raportimeve nga prestigjiozja spanjolle Sport.es, klubi katalanas ka ndjekur nga afër paraqitjet e anësorit të Lille gjatë këtij sezoni.
Lojtari 25-vjeçar ka impresionuar me performancat e tij në Ligue 1, duke tërhequr vëmendjen e disa klubeve të mëdha evropiane. Mësohet se Zhegrova ka refuzuar rinovimin me Lille, gjë që ka shtyrë klubin francez të shqyrtojë mundësinë e shitjes së tij gjatë merkatos së verës. Çmimi fillestar për kartonin e tij është vendosur në 30 milionë euro.
Megjithatë, përpara se të ndërmarrë hapa konkretë për transferimin e tij, Barcelona duhet të analizojë situatën e kufizimeve financiare dhe shpenzimeve për pagat e lojtarëve. Klubi blaugrana është ende duke u përballur me sfidat e Fair Play-it Financiar, gjë që mund të ndikojë në aftësinë e tyre për të bërë blerje të reja.
Nëse situata ekonomike e Barcelonës e lejon këtë lëvizje, Zhegrova mund të bëhet një alternativë e vlefshme për repartin ofensiv të skuadrës, duke sjellë shpejtësi dhe kreativitet në lojën e katalanasve. Për momentin, mbetet për t’u parë nëse interesimi i Barcelonës do të konkretizohet në një ofertë zyrtare gjatë afatit kalimtar të verës.
