Procesi i dialogut në Bruksel mes kryenegociatorëve pritet të vazhdojë muajin e ardhshëm.
Kjo së paku sipas Klisman Kadiut, këshilltar i zëvendeskryeministrit Besnik Bislimi, i cili tha se takimi i radhës do të zhvillohet më 17 dhjetor në Bruksel.
Por, kjo nuk u konfirmua nga BE-ja.
“Do të njoftojmë çdo takim kurdo që duhet”, ka thënë një zëdhënës i BE-së për Klan Kosovën.
E një ditë më parë, emisari i Bashkimit Evropian për dialogun Kosovë-Serbi, Miroslav Lajçak kishte njoftuar se takimi i ardhshëm në nivel kryenegociatorësh do të mbahet në muajin dhjetor.
Ai njoftoi përmes llogarisë së tij në Facebook se dy javët e fundit kanë qenë produktive dhe me vizita.
Lajçaku tha se është angazhuar në diskutime të rëndësishme mbi dialogun dhe rrugën përpara.
