Flamengo është shpallur kampion i Amerikës së Jugut pasi mposhti Palmeiras me rezultatin 1:0 në finalen e Copa Libertadores, e cila u zhvillua në stadiumin Monumental të Limas.
Dy skuadrat braziliane ofruan një ndeshje të fortë dhe të luftuar, siç ndodh zakonisht në finalet e kësaj gare prestigjioze. Loja u karakterizua nga duele të ashpra, duke prodhuar 33 faulle dhe gjithsej shtatë kartonë të verdhë.
Pavarësisht intensitetit të lartë, vetëm një gol vendosi fatin e trofeut. Në minutën e 67-të, ish-mbrojtësi i Reali Madridit dhe Juventusit, Danilo shënoi për tu shndërruar në hero të skuadrës së tij.
Ky triumf i siguroi Flamengos trofeun e katërt të Copa Libertadores në histori. Klubi brazilian kishte fituar më herët në vitet 1981, 2019 dhe 2022.
Palmeiras mbetet me tre tituj në këtë kompeticion, të fituar në vitet 1999, 2020 dhe 2021, ndërsa kjo humbje i ndaloi ata të barazonin rekordin e Flamengos.
