Ka disa ëmbëlsira që nuk kanë nevojë për zbukurime moderne për të të magjepsur. Një prej tyre është krem karameli i thjeshtë në përbërës, por i pasur në ndjesi. Aroma e qumështit të ngrohtë, vezët që lidhen butësisht dhe karameli që shkrin në gojë e bëjnë këtë recetë një klasik që nuk del kurrë nga moda.
E njohur nga breza të tërë, kjo ëmbëlsirë është shërbyer dikur në ditët e veçanta familjare, kur çdo gjë përgatitej me dorë dhe me durim. Sekreti i saj nuk është asgjë tjetër veç balancës mes thjeshtësisë dhe finesës.
Përgatitet me pak përbërës: vezë, qumësht, vanilje dhe sheqer. Por nëse ndalesh te çdo lugë, ndjen më shumë se shije ndjen kujtim. Ndjen aromën e shtëpisë, tingullin e enëve që përgatiten për një gëzim të vogël, ndjen dashurinë e fshehur në gatim.
Krem karameli është i butë, i lehtë, i freskët dhe mbi të gjitha e papërballueshme për t’u refuzuar. Nuk është një ëmbëlsirë që shitet me pamje. Ajo të fiton me karakter.
Në një kohë ku çdo gjë është me nxitim, ndoshta është mirë të ndalemi një çast dhe t’i rikthehemi një gëzimi të thjeshtë: një porcion krem karamel, një filxhan kafe dhe një buzëqeshje që vjen natyrshëm.
Përgatitja:
-
Për karamelin:
Në një tigan shkrij sheqerin me pak ujë në zjarr të mesëm. Mos e përziej, lëviz vetëm tiganin. Kur të marrë ngjyrë të artë, hiqe dhe derdhe shpejt nëpër fundin e formave që do përdorësh (mund të jenë të vogla ose një enë e vetme). -
Për kremin:
Në një enë rrih vezët me sheqerin, shto qumështin dhe vaniljen. Përziej ngadalë, pa krijuar shkumë. Kaloje masën nëpër forma, mbi karamelin e ftohur. -
Pjekja:
Vendosi format në një tavë me ujë (banjomari). Piqen në 150°C për 40–50 minuta. Kur të jenë mpiksur, hiqi dhe lëri të ftohen. Mbaji në frigorifer për të paktën 3 orë para se t’i shërbesh. -
Shërbimi:
Ktheje përmbys në pjatë – karameli i lëngshëm do të rrjedhë mbi krem dhe do e bëjë ëmbëlsirën të duket si nga ëndrrat.
