Kuvendi vazhdon sot seancën për konstituim, PDK dhe AAK deklarohen se s’kanë votë për Haxhiun

Kuvendi i Kosovës sot mban seancën e parë pas publikimit të aktgjykimit të plotë për bllokadën parlamentare, që përcaktoi 30 ditë për konstituimin e këtij institucioni.

Afati ka nisur të rrjedhë të hënën dhe kësisoj Gjykata Kushtetuese urdhëroi deputetët që të përfundojnë këtë proces.

Lëvizja Vetëvendosje, si partia e parë, ka të drejtën për të propozuar emrin për kryeparlamentar, i cili zgjedhet përmes votimit të hapur dhe se i njëjti kandidat votohet jo më shumë se 3 herë.

Kjo parti sipas të gjitha gjasave do të insistojë në emrin e Haxhiut, ndërsa ish opozita nuk ka treguar gatishmëri për t’i dhënë votë.

Rexhepi: Aq sa lejon Gjykata Kushtetuese, do ta votoj Albulena Haxhiun

Deputetja nga radhët e komunitetit boshnjak Emilja Rexhepi, është deklaruar para nisjes së vazhdimit të seancës konstituive të Kuvendit.

“E shohim se si shkon situata sot dhe pastaj vendosim”, deklaroi ajo para mediave.

Ajo u shpreh se do ta votojë sërish kandidaten e VV-së Albulena Haxhiu.

“Unë e respektoj vendimin e Gjykatës Kushtetuese. Do ta votoj Albulena Haxhiu aq sa lejon Gjykata Kushtetuese”, theksoi ajo.

“Te shohim ndoshta brenda 30 ditëve përfundon kjo punë”.

PDK merr pjesë në votim – Blerta Deliu-Kodra: Do të votojmë kundër Albulena Haxhiut

Deputetja e Partisë Demokratike të Kosovës, Blerta Deliu-Kodra, ka konfirmuar se PDK do të marrë pjesë në votimin e sotëm për zgjedhjen e kryetarit apo kryetares së re të Kuvendit të Kosovës.

Në një deklaratë për media, ajo theksoi se partia që përfaqëson do të jetë pjesë e procesit, por se do të votojnë kundër kandidaturës së Albulena Haxhiut nga Lëvizja Vetëvendosje.

Haradinaj: Nuk kemi votë për Haxhiun, do ta mbështesnim një kandidat tjetër nga LVV-ja

Kryetari i Aleancës për Ardhmërinë e Kosovës (AAK), Ramush Haradinaj, ka deklaruar para fillimit të seancës së Kuvendit se vendimi i Gjykatës Kushtetuese ka sqaruar disa çështje të rëndësishme që lidhen me zgjedhjen e kryetarit të Kuvendit.

“Është sqaruar se votimi duhet të jetë i hapur, se një kandidat nuk mund të kandidojë më shumë se tri herë nëse nuk merr votat, dhe po ashtu është përcaktuar afati 30-ditor për konstituimin e Kuvendit”, ka thënë Haradinaj.

Ai shtoi se AAK nuk do ta votojë Albulena Haxhiun për kryetare të Kuvendit, por do të mbështeste një kandidat tjetër nga LVV-ja që, sipas tij, do të ishte më unifikues.

“Nëse sot do të ishte Glauk Konjufca, Saranda Bogujevci apo Shqipe Haxha Hetemi, do ta votonim,” tha ai.

I pyetur se çfarë do të ndodhë nëse Kuvendi nuk arrin të konstituohet as brenda afatit prej 30 ditësh, Haradinaj u shpreh se kjo do të dëshmonte qëllimin e kryeministrit në detyrë, Albin Kurti.

“Për fat të keq, unë besoj se qëllimi i tij nuk ka ndryshuar, të vazhdojë ta mbajë Kosovën peng dhe ta udhëheqë në mënyrë jo të ligjshme”, u shpreh Haradinaj.

Nura: Shpresoj që VV ka reflektuar dhe i ka parë dëmet që i ka bërë

Deputeti i PDK-së Jakup Nura, ka folur për mediat para nisjes së vazhdimit të seancës konstituive.

Nura deklaroi se VV-ja ka pasur kohë të reflektojë dhe të shoh dëmet që i ka bërë.

“Shpresoj dhe besoj që do të nxjerrë një figurë që është më unifikuese. Ashtu siç edhe e kemi thënë edhe më herët, Partia Demokratike e Kosovës, në qoftë se është një figurë që s’ka qenë i implikuar në krim dhe korrupsion do ta votojmë”. deklaroi ai para mediave njofton Klankosova.tv.

Kjo seancë vjen pas publikimit të plotë të aktgjykimit të Gjykatës Kushtetuese.