Avokati i Hashim Thaçit, Luka Mishetiq, ka akuzuar Prokurorinë e Specializuar se ka mbajtur të fshehura provat deri në dorëzimin e dosjes përfundimtare, duke theksuar se ZPS e dinte që mbrojtja do t’i kontestonte ato.
Ai gjithashtu theksoi se ZPS po ndryshon mënyrën e paraqitjes së provave në kundërpërgjigjet e saj.
Për më tepër, Mishetiq përmendi dëshminë e Bislim Zyrapit, duke e quajtur atë jo të besueshëm.
“Të mërkurën i kërkuam ZPS-së të na shpjegonte se si arriti në këtë përfundim, kur Zyrapi ishte i pranishëm [në takimet e UÇK-së] dhe Zyrapi nuk ishte anëtar i NPK-së. Ne nuk dëgjuam asnjë përgjigje, dhe arsyeja për këtë është se Prokuroria nuk ka asnjë përgjigje. Për ne kjo nuk ka kuptim”, tha Mishetiq.
Po ashtu, avokati shtoi se ZPS duhet t’i informojë mbrojtjen për të gjitha provat që i posedojnë ndaj të akuzuarve.
