Policia e Kosovës e ka pranuar sot një informacion për një mjet të dyshuar në një pompë të derivateve, në rrugën Prishtinë – Fushë Kosovë. Menjëherë është rrethuar vendi i ngjarjes.
Flora Ahmeti, zëdhënëse për media në rajonin e Prishtinës, ka thënë se bëhet fjalë për një automjet të parkuar në afërsi të pompës.
“Rreth orës 16:00 kemi pranuar informatën për një mjet të dyshuar në rrugën Prishtinë -Fushë Kosovë, saktësisht në një automjet të parkuar në afërsi të një pompe të derivateve”.
“Policia menjëherë ka dalë në vendin e ngjarjes dhe ka nisur ndërmarrjen e veprimeve operative të nevojshme për të menaxhuar me situatën”, ka thënë Ahmeti.
