Deputeti i Lëvizjes Vetëvendosje, Hekuran Murati theksoi sot se refuzimi i deputetëve nga PDK/LDK/AAK për ta votuar si nënkryetar një deputet që nuk është i Listës Serbe nënkupton se PDK/LDK/AAK po e ruajnë pozitën e nënkryetarit për dikë nga radhët e Listës Serbe.
Murati në një postim në Facebook shkruan se duke mos pasur guximin politik ta votojnë qysh tash dikë të Listës Serbe, po presin derisa çështja të shkojë në Gjykatë Kushtetuese (për këtë edhe u bënë kinse e përjashtuan nga AAK deputetin Adem Hoxha, që ai t’ia sigurojë nënshkrimin e 10-të Listës Serbe), me shpresën që Gjykata Kushtetuese i nxjerr nga situata, që pastaj të thonë se “s’patëm qare pa votu se na detyroi Gjykata Kushtetuese”.
“Pretendimi i opozitës se gjoja vetëm një deputet i Listës Serbe mund të zgjidhet nënkryetar i Kuvendit se përndryshe po u shkelka Kushtetuta, është i pavërtetë. Kushtetuta e thotë që nënkryetari duhet të jetë nga radhët e deputetëve që përfaqësojnë komunitetin jo-shumicë serb, kaq. Pra, nuk ka ekskluzivitet apo monopol Lista Serbe në këtë rast”, shkruan ai.
Ai tutje thotë se “në vitin 2021, që të gjithë 10 deputetët që përfaqësojnë komunitetin jo-shumicë serb në Kuvend ishin nga Lista Serbe, pra nuk kishte opsion tjetër. Kurse tash në vitin 2025 janë 9 deputetë nga Lista Serbe dhe 1 deputet që nuk është i Listës Serbe, pra ka opsion tjetër”.
Sipas Muratit, për më tepër, ndërmjet këtyre dy kohëve është edhe sulmi terrorist në Banjskë të udhëhequr nga terroristi Milan Radojçiq, i cili ende sillet i lirë në Serbi dhe vazhdon ta dirigjojë Listën Serbe.
“Ky është argumenti i cili do duhej të bindte secilin deputet të Kuvendit që të mos e votojnë askënd nga Lista Serbe për nënkryetar të Kuvendit”, thotë ai. /Telegrafi/
