Organizata e Veteranëve të Luftës së UÇK-së ka reaguar pas raportimeve se një ish-rojë burgu në Hagë është rekrutuar nga Zyra e Prokurorit të Specializuar, duke iu dhënë roli i prokurorit në procesin gjyqësor ndaj ish-krerëve të UÇK-së.
Sipas OVL-UÇK-së, ky zhvillim e vendos në pikëpyetje serioze gjithë integritetin e procesit gjyqësor që po zhvillohet në Dhomat e Specializuara.
“Ky veprim e zhvesh përfundimisht këtë proces nga çdo petk i paanshmërisë. Ai konfirmon dyshimet tona se procesi nuk është as i drejtë dhe as ligjor, por një ndjekje politike e organizuar ndaj Ushtrisë Çlirimtare të Kosovës” thuhet në reagim.
Nga kjo organizatë i është bërë thirrje opinionit publik, shoqërisë civile dhe institucioneve ndërkombëtare që të mos heshtin përballë këtij skandali.
