Sindikata e Policisë së Kosovës (SPK) ka mirëpritur vendimin e Gjykatës së Apelit, e cila ka anuluar aktvendimin e Gjykatës Themelore në Lipjan dhe ka kthyer në rivendosje çështjen ndaj pesë zyrtarëve policorë të akuzuar për “vrasje nga pakujdesia” në rastin e 27-vjeçarit Agon Zejnullahu.
Në një njoftim zyrtar, SPK e ka vlerësuar këtë vendim si një hap të rëndësishëm për respektimin e parimeve të drejtësisë dhe procesit ligjor të rregullt.
“Ky vendim i Gjykatës së Apelit, që anulon aktvendimin e Gjykatës Themelore dhe e kthen çështjen në rivendosje, është një hap i rëndësishëm drejt respektimit të parimeve të drejtësisë dhe të procesit të rregullt ligjor. Vendimi gjithashtu thekson mungesën e analizës së plotë të provave relevante dhe të besueshme, duke nënvizuar nevojën për qasje objektive dhe të paanshme në çdo rast që përfshin zyrtarë të rendit”, thuhet tutje ne vendim.
