Çmimet e specave për turshi kanë shënuar rritje këtë vit në tregjet e Kosovës, duke arritur kilogrami deri në 1 euro e 50 centë.
Shitësit në Tregun e Gjelbër në Prishtinë, me të cilët bisedoi Ekonomia Online, thanë se kjo është pasojë e thatësirës dhe kushteve klimatike, ndërsa vlerësojnë se me fillimin e shtatorit do të shtohet edhe më shumë interesimi i qytetarëve për blerje.
Shitësi Riza Krasniqi tha se këtë vit specat janë më të shtrenjtë krahasuar me vitin e kaluar. Ai pohoi se interesimi për blerje ekziston, por sezoni kryesor pritet të nisë nga shtatori.
“Momentalisht specat janë duke shkuar 1 euro e 30 centë deri në 1 euro e 50 centë. Po sivjet janë më të shtrenjtë. Ka interesim. Ende nuk ka filluar sezoni, moti i nxehtë, nga shtatori fillon sezoni e turshive. Vjet ka qenë 1 euro, sivjet 1 euro e 50 centë. Nuk besoj që lirohen. Se koha e ka bërë, thatësira ka ndikuar. Por ende nuk ka filluar sezoni”, tha ai.
Ndërsa, shitësi tjetër Shaban Bislimi dha një vlerësim ndryshe. Ai tha se çmimet e specave për turshi lëvizin nga 1 euro e 10 centë deri në 1 euro e 20 centë kilogrami dhe se, sipas tij, nuk ka dallim me vitin e kaluar, përkundrazi janë më të lira. Bislimi tha se interesimi i blerësve tashmë ka filluar dhe se shtatori është muaji kur rritet kërkesa për turshi.
“Po çmimet e turshive janë 1 euro e 10 centë, 1 euro e 20 cent kilogrami. Jo nuk ka dallim, përkundrazi janë më lirë. Ka filluar interesimi se shtatori zakonisht fillon interesimi më i madh”, tha ai.
