Shirat e rrëmbyeshëm përfshinë New Yorkun të enjten, duke vrarë dy persona në qytet, tha kryebashkiaku Eric Adams, ndërsa stuhitë shoqëruese ndërprenë fluturimet dhe autoritetet meteorologjike paralajmëruan për përmbytje në disa zona.
Mediat amerikane kanë raportuar incidente përmbytjesh dhe dëmesh materiale në disa pjesë të qytetit, ndërsa zyrtarët në aeroportet JFK, LaGuardia dhe Newark thanë se oraret e fluturimeve janë ndërprerë për shkak të kushteve ekstreme të motit.
Sipas autoriteteve meteorologjike, në Central Park u regjistrua një sasi rekord prej 4.7 cm shiu, ndërsa 5.31 cm ranë në Aeroportin LaGuardia dhe 5.05 cm në Aeroportin Ndërkombëtar Newark Liberty në New Jersey, raporton cnn.
Shirat e dendur kanë shkaktuar vështirësi në qarkullimin rrugor dhe ndërprerje të përkohshme të transportit publik në disa zona të qytetit. Autoritetet kanë paralajmëruar banorët të shmangin udhëtimet e panevojshme dhe të ndjekin udhëzimet e emergjencës derisa moti të stabilizohet.
