Teknikat e modifikimit gjenetik mund të hapin rrugën për eliminimin e kromozomit shtesë që shkakton Sindromën Down, sugjerojnë studime të hershme.
Sindroma Down, ndodh si rezultat i një kopje shtesë të kromozomit 21. Normalisht, një individ trashëgon nga një kopje të secilit kromozom nga prindërit, por në këtë rast, ekzistojnë tre kopje të kromozomit 21.
Hulumtimet e reja të publikuara në PNAS Nexus tregojnë se shkencëtarët japonezë kanë përdorur teknologjinë CRISPR-Cas9 për të hequr kromozomin e tepërt në qelizat me trisomi 21 të kultivuara në laborator. Kjo teknikë lejon identifikimin e kromozomit të duplikuar dhe eliminimin e tij, duke ruajtur nga një kopje të kromozomit 21 nga secili prind.
Megjithëse këto rezultate janë premtuese, metoda ende nuk është gati për testime tek kafshët, pasi mund të shkaktojë ndryshime në kromozomet e mbetura. Sidoqoftë, studiuesit besojnë se ky studim vendos bazat për trajtime më të avancuara në të ardhmen për trisominë 21, duke hapur horizonte të reja në mjekësinë gjenetike.
