Viola Ford Fletcher, një nga të fundit të mbijetuar të Masakrës së Tulsa-s të vitit 1921, ka ndërruar jetë në moshën 111-vjeçare. Pavarësisht moshës së thyer, Fletcher ishte bërë një zë i rëndësishëm në betejën për drejtësi dhe njohje të këtij kapitulli të errët të historisë amerikane.
Lajmin e vdekjes e konfirmoi kryetari i bashkisë së Tulsa-s, Monroe Nichols, i cili e përshkroi Fletcher-in si simbol të të vërtetës, qëndrueshmërisë dhe forcës. “Ajo ishte kujtesa e një tragjedie të pamasë dhe një kujtesë se sa shumë kemi ecur dhe sa rrugë kemi ende përpara,” shkroi ai.
Fletcher ishte vetëm shtatë vjeç kur ndodhi masakra. Ngjarja nisi më 31 maj 1921, pasi 19-vjeçari Dick Rowland, një djalë i ri afro-amerikan, u arrestua nën dyshimin se kishte sulmuar një grua të bardhë. Akuza që më vonë rezultoi e pabazë ndezi tensionet racore në qytet. Turma të dhunshme të banorëve të bardhë, të mbështetura nga forcat e rendit, dogjën dhe shkatërruan 35 blloqe të lagjes Greenwood, komuniteti më i pasur afro-amerikan i kohës.
Raportet e mëvonshme vlerësojnë se deri në 300 persona u vranë dhe rreth 700 të tjerë u plagosën. Shumë viktima u varrosën në varre të paidentifikuara, ndërsa dëmet ekonomike llogariten sot në rreth 32.2 milionë dollarë. Familja e Fletcher-it, si shumë të tjerë, u detyrua të largohej dhe përfundoi në varfëri duke punuar si ndarës prodhimi.
Megjithëse Rowland nuk u akuzua kurrë, pasi gruaja që u përfshi në incident vendosi të mos ngrejë padi, masakra u la për dekada jashtë vëmendjes publike. Vetëm në vitin 1997 Oklahoma ngriti një komision hetimor, ndërsa përpjekjet e vitit 2001 për kompensim dështuan për shkak të afateve ligjore.
Në 2021, në 100-vjetorin e ngjarjes, Fletcher dëshmoi para Kongresit të SHBA-së, duke rrëfyer përvojën e saj. Dy vjet më vonë, ajo publikoi kujtimet “Don’t Let Them Bury My Story”, të shkruara së bashku me nipin e saj.
