Një aksident rrugor është shënuar këtë pasdite në zbritje të Qafë Thanës, pranë zonës së njohur si “Uji i Ftohtë”, ku janë përfshirë dy automjete të vogla dhe një minibus që transportonte ekipin e vajzave të volejbollit të Skënderbeut.
Sipas burimeve nga vendngjarja, aksidenti ndodhi si pasojë e një manovre të gabuar nga një prej mjeteve, çka solli përplasjen e trefishtë të automjeteve. Si pasojë, kanë mbetur të lënduar lehtë disa prej drejtuesve të mjeteve, ndërsa volejbollistet kanë shpëtuar pa dëmtime fizike, por kanë përjetuar tronditje të forta psikologjike.
Ekipi i Skënderbeut po udhëtonte drejt Tiranës për të zhvilluar ndeshjen e dytë finale të kampionatit kombëtar të volejbollit për femra.
Policia ndodhet në vendin e ngjarjes dhe po kryen veprimet hetimore për të përcaktuar rrethanat e sakta të aksidentit.
Ndërkohë, drejtuesit e shumësporteve në Korçë i kanë kërkuar Federatës Shqiptare të Volejbollit që ndeshja finale të shtyhet për në një datë tjetër, për shkak të gjendjes emocionale të ekipit pas aksidentit.
