Kryeministri në detyrë dhe kryetari i LVV-së, Albin Kurti, ka deklaruar se kjo është hera e tretë që partia e tij del e para në zgjedhje. Ai theksoi se përgatitjet për zgjedhjet lokale janë në vijim dhe se reformat duhet të ndodhin edhe në komunat, ashtu si në nivelin qendror.
“Komunat që udhëhiqen nga LVV janë shembull i qeverisjes së mirë”, u shpreh Kurti.
Duke folur për konstituimin e Kuvendit, ai tha se procesi po zvarritet, për shkak se Kushtetuta nuk parasheh çfarë ndodh kur kandidati për kryetar Kuvendi nuk siguron votat e nevojshme.
“Kuvendi nuk themelohet nga fituesi, por nga të gjithë deputetët. Ne kemi propozuar kandidaten tonë, Albulena Haxhiun. Bllokimi vjen nga ata që votojnë kundër ose nuk marrin pjesë në votim,” tha Kurti, duke shtuar se nëse shkohet sërish në zgjedhje, rezultati do të jetë edhe më i favorshëm për LVV.
