Samsung Electronics bëri publike të martën modelin e saj më të hollë kryesor deri më sot, të “plotësuar” me karakteristika të përmirësuara të Inteligjencës Artificiale, ndërsa kërkon të kalojë rivalin Apple.
Lansimi i S25 Edge është projektuar për të shfrytëzuar kërkesën në rritje, veçanërisht nga konsumatorët në të 20-at dhe 30-at e tyre, për telefona inteligjentë më portativë, shkruajnë mediat e huaja, përcjell Telegrafi.
“Reagimet ishin të qarta – përdoruesit donin diçka më të hollë dhe më të lehtë për t’u mbajtur pa sakrifikuar performancën”, tha Samsung, i cili bëri ndryshime strukturore për të zvogëluar trashësinë e komponentëve të brendshëm.
Dhe analistët thonë se lansimi ishte në kohën strategjike për të paraprirë Apple, e cila pritet të lansojë një iPhone më të hollë në gjysmën e dytë të këtij viti.
“Duke e lansuar produktin disa muaj më parë, Samsung mund të ketë ndikim te Apple dhe të tërheqë konsumatorët që kërkojnë telefona inteligjentë më të hollë. Duket se është një vendim i llogaritur për të kapur atë segment të kërkesës”, tha Ryu Young-ho, një analist i lartë në NH Investment & Securities.
S25 Edge do të dalë në shitje në Korenë e Jugut më 23 maj dhe në Shtetet e Bashkuara më 30 maj, tha Samsung, duke shtuar se do ta lansojë atë në rreth 30 vende, përfshirë Kinën dhe Evropën.
