Një grua e moshuar është gjetur pa shenja jete sot në lagjen Ulpiana, përballë shkollës fillore “Hasan Prishtina” në Prishtinë.
Sipas burimeve të Rilindjashqiptare, trupi i pajetë ishte në gjendje të dekompozuar dhe kundërmonte erë të rëndë, duke lënë të kuptohet se viktima kishte ndërruar jetë disa ditë më parë. Dyshohet se ajo jetonte e vetme në banesë.
Në vendin e ngjarjes kanë ndërhyrë edhe njësitet e zjarrfikësve për të hapur derën e banesës, pasi nuk kishte asnjë përgjigje nga brenda. Pas hapjes, aty kanë arritur edhe njësitë policore dhe ekipi ligjor për të kryer procedurat e nevojshme hetimore.
Rasti është duke u trajtuar nga autoritetet kompetente, ndërsa pritet raporti zyrtar për të përcaktuar shkaqet e vdekjes.
