Kapiteni i Italisë, Gianluigi Donnarumma, ka arritur marrëveshje për kushtet personale me Manchester Cityn, por transferimi i tij në ‘Etihad’ ende varet nga e ardhmja e portierit aktual të Cityt, Ederson, sipas përditësimeve të së premtes.
Siç raportoi Football Italia në fillim të javës, City është i gatshëm të investojë rreth 30 milionë euro për të siguruar shërbimet e Donnarummas, i cili është shtyrë drejt largimit nga PSG pas dështimit për të rinovuar kontratën dhe pas transferimit të portierit francez Lucas Chevalier.
Ish-portieri i Milanit thuhet se ka arritur marrëveshje për kushtet personale me Manchester City, gjë që është konfirmuar nga Fabrizio Romano të premten.
Megjithatë, lëvizja e Donnarummas drejt Cityt ende varet nga e ardhmja e Edersonit, i cili ka qenë zgjedhja e parë e Pep Guardiolës gjatë gjashtë titujve të fituar në Ligën Premier.
Braziliani është përfolur gjatë gjithë afatit kalimtar për një largim të mundshëm nga ‘Etihad’.
Aktualisht, City është shumë i mbuluar në repartin e portierëve, pas transferimit të James Trafford nga Burnley më herët gjatë verës. Trafford ka qenë titullar në dy ndeshjet e para të sezonit të Ligës Premier.
Si rrjedhojë, Donnarumma po pret me shpresë që Ederson të arrijë një marrëveshje për t’u larguar nga City përpara mbylljes së afatit kalimtar.
Fabrizio Romano raporton se Galatasaray është i interesuar për 32-vjeçarin, ndërkohë që Al-Nassr për momentin nuk është pjesë e garës për nënshkrimin e tij./Telegrafi/
