Rrjeti më i madh social Facebook (Meta) feston sot, më 3 shkurt, ditëlindjen e 21-të.
2 vjet më parë, më 4 shkurt 2004, një student i vitit të dytë në Harvard promovoi një faqe Interneti nga dhoma e tij e konviktit.
Nuk e dinte ai se projekti, i quajtur TheFacebook, do të shndërrohej në një fenomen global që do të ndryshonte rrënjësisht mënyrën se si miliarda njerëz komunikojnë, lidhen dhe konsumojnë informacione. E gjitha filloi si një eksperiment.
Në tetor të vitit 2003, 19-vjeçari Mark Zuckerberg krijoi Facemash, një faqe ku studentët mund të vlerësonin atraktivitetin e bashkëmoshatarëve të tyre. Për të marrë fotot, ai hyri në serverat e sigurt të Harvardit, gjë që zemëroi administratën dhe e mbylli faqen.
Edhe pse Zuckerberg u ndëshkua, Facemash vërtetoi një pikë kyçe: ekzistonte një dëshirë e madhe dhe e pashfrytëzuar për një përvojë sociale dixhitale të bazuar në identitete të vërteta.
Disa muaj më vonë, më 4 shkurt 2004, “TheFacebook.com” pa dritën e ditës. Zuckerberg e realizoi idenë me ndihmën e kolegëve: Eduardo Saverin , i cili drejtonte anën e biznesit, programuesin Dustin Moskovitz , dizajnerin grafik Andrew McCollum dhe Chris Hughes , përgjegjës për promovimin. Secili investoi rreth një mijë dollarë. Suksesi ishte i menjëhershëm. Në 24 orët e para, u regjistruan më shumë se 1,200 studentë të Harvardit dhe deri në fund të muajit, më shumë se gjysma e të gjithë studentëve të ciklit të parë kishin profilin e tyre. Platforma u përhap shpejt në universitete të tjera prestigjioze si Yale, Stanford dhe Columbia.
Zuckerberg e njohu mundësinë dhe veproi me një shpejtësi të jashtëzakonshme. Në qershor të vitit 2004, ai dhe një ekip i vogël u zhvendosën në Palo Alto të Kalifornisë, në zemër të Silicon Valley. Atje, ata siguruan investimin e tyre të parë të madh prej 500,000 dollarësh nga bashkëthemeluesi i PayPal, Peter Thiel . Deri në dhjetor të atij viti, Facebook kishte një milion përdorues.
Në fund të janarit 2026, Zuckerberg ‘fitoi’ një shumë të pabesueshme prej 22 miliardë dollarësh vetëm në një ditë, pasi Meta publikoi një raport të fortë financiar dhe shkaktoi një rritje të çmimit të aksionit.
