Klubi kryesor i futbollisteve në vend, Mitrovica, ka lëshuar akuza të rënda pasi i ka dështuar edhe një ndeshje kampionale.
Mitrovica të shtunën është dashur të luajë në shtëpi ndaj skuadrës Presingu. Por kjo skuadër, sipas njoftimit të klubit mitrovicas, nuk ka udhëtuar për ta luajtur ndeshjen. Sipas Mitrovicës, arsyeja dihet – për të mos pranuar 20 gola.
“Nuk kemi se si të mos reagojmë kur e njëjta gjë përsëritet për shumë vjet. Formohen klube në futboll të femrave vetëm sa për të marrë pjesë në gara e në të njëjtën kohë të përfitojnë ndonjë financë nga FFK-ja apo komuna, që edhe ato nuk i investojnë në klub, por në xhepat e disave për përfitime personale”, thuhet në një reagim që KFF Mitrovica e ka publikuar në faqen zyrtare në “Facebook”.
Mitrovica ka në përbërje shumë reprezentuese të Kosovës e disa të Shqipërisë. Ndan rregullisht paga dhe shquhet për organizim. Mitrovica ka dominuar futbollin e femrave në vitet e fundit në vend, ndërsa hapa para ka bërë edhe në Ligën e Kampionëve.
Por Mitrovicën në vitet e kaluara e ka goditur mungesa e konkurrencës në ligën vendore.
“Ne si klub ka vite që kemi kërkuar që të zvogëlohet liga në gjashtë apo tetë ekipe, që të jetë ligë më serioze e jo një ligë me 13-14 ekipe e me dallim shumë të madh, ku pastaj detyrohemi t’i kursejmë ekipet e dobëta nga golat. Shumë herë në ndeshje janë shënuar edhe më shumë se 20 gola. Ka ardhur momenti që të ndryshohet sistemi i garave, pasi kështu nuk ka kuptim”, shkruan tutje KFF Mitrovica.
“Kërkojmë nga komisioni i garave të ndërmarrë masa ndaj klubeve që nuk po udhëtojnë në ndeshjet zyrtare. Sepse kështu po i humb kuptimi Kampionatit”.
Sipas tabelës së publikuar në faqen zyrtare të FFK-së, Mitrovica është e para në tabelë me 54 pikë nga 19 ndeshje. Ka goldallim plot 175. Ka shënuar 177 gola e ka pranuar vetëm dy. E dyta është Hajvalia, që këtë edicion po e rivalizon Mitrovicën. I ka 54 pikë nga 18 ndeshje. Goldallimi i Hajvalisë është plus 118. Ka shënuar 127 gola e ka pranuar nëntë.
Liga e Parë e futbollisteve i ka plot 13 ekipe. E 13-a është skuadra Heroinat, që nuk ka pika, ndërsa ka goldallim minus 174. I ka shënuar tre gola e i ka pranuar 177. Intelektualet e vendit të parafundit, i ka tri pikë. Ka shënuar 14 gola e ka pranuar 165, në bazë të tabelës së publikuar.
Mungesa e konkurrencës ka qenë prej fillimit pengesë për ligën e futbollisteve. Disa skuadra kanë lojtare shumë të reja në moshë dhe kjo më pas bën dallimin e madh. Por përkrahja për klubet e futbollisteve vlerësohet e madhe. Kjo vlerësohet të jetë edhe arsyeja që disa klube janë formuar – përfitimi i fondeve.
Mitrovica në xhirot e fundit ka fitore 12:0, 18:0, 6:0. Por edhe skuadrat e tjera kanë fitore 8:0, 12:0, 9:0, 12:2, 10:1, 18:0, 14:0, 16:0, 15:1.
Edhe në liga të tjera të sportisteve ka mungesë të konkurrencës. Shkëputja e skuadrave të kreut me ato të pjesës së poshtme të tabelës vlerësohet shumë e madhe.
