Blerina Muhaxheri vlerësohet në Paris për artin që promovon traditën shqiptare
Artistja kosovare merr mirënjohje për merita artistike në ekspozitën ndërkombëtare Art Shopping, në Carrousel du Louvre, Paris.
Artistja nga Kosova, Blerina Muhaxheri, e njohur në botën e artit si @blersarts, është vlerësuar me mirënjohje për merita artistike gjatë pjesëmarrjes në ekspozitën ndërkombëtare Art Shopping, që po mbahet në Carrousel du Louvre, në Paris të Francës.
Në këtë ngjarje artistike ndërkombëtare, ku prezantojnë krijimtarinë e tyre artistë nga vende të ndryshme të botës, Muhaxheri ka sjellë vepra të frymëzuara nga kultura, historia dhe tradita shqiptare, duke promovuar trashëgiminë tonë kulturore para publikut ndërkombëtar.
Tradita shqiptare në një frymë bashkëkohore
E njohur për stilin e saj të veçantë, Blerina ndërthur në krijimtarinë e saj tri teknika artistike: pikturimin me spatulë, përdorimin e brushës dhe relievin tredimensional (3D). Përmes këtij kombinimi, ajo u jep motiveve tradicionale shqiptare një interpretim bashkëkohor dhe origjinal.
Figura e gruas shqiptare me veshje tradicionale ka qenë vazhdimisht një nga temat kryesore të punës së saj artistike. Megjithatë, për prezantimin në Paris, artistja ka zgjedhur të sjellë figurën e burrit shqiptar, të cilën e paraqet si simbol të forcës, qëndresës dhe rolit të përbashkët në ruajtjen e identitetit dhe trashëgimisë shqiptare.
“Jam e lumtur që po prezantoj kulturën tonë para publikut të huaj”
Duke folur për këtë vlerësim, Muhaxheri ka shprehur kënaqësinë që arti i saj, i frymëzuar nga tradita shqiptare, po mirëpritet edhe jashtë vendit.
“Për mua është një ndjenjë shumë e veçantë të shoh se arti im, i frymëzuar nga tradita jonë shqiptare, po mirëpritet dhe vlerësohet edhe ndërkombëtarisht. Jam shumë e lumtur që përmes pikturave të mia kam mundësinë të prezantoj një pjesë të kulturës sonë para publikut të huaj”, është shprehur ajo.
Një tjetër hap në rrugëtimin artistik
Pas ftesave për pjesëmarrje në ekspozita ndërkombëtare në Milano dhe Vjenë, prezantimi dhe vlerësimi në Paris përbëjnë një tjetër moment të rëndësishëm në rrugëtimin artistik të Blerinës.
Përmes veprave të saj, artistja vazhdon të promovojë bukurinë e veshjeve tradicionale shqiptare dhe vlerat e trashëgimisë kulturore, duke i sjellë ato përmes një gjuhe artistike bashkëkohore.
Pjesëmarrja në ekspozita ndërkombëtare i krijon mundësi që krijimtaria e saj dhe motivet shqiptare të njihen nga një audiencë më e gjerë, duke e çuar kulturën tonë përtej kufijve të Kosovës.
