Google së shpejti mund të bëjë një nga ndryshimet më të mëdha në motorin e saj të kërkimit deri më sot, dhe kjo është futja e inteligjencës artificiale si mënyra e parazgjedhur për të shfaqur rezultatet.
Në fakt, Logan Kilpatrick, menaxher produkti për Google AI Studio, iu përgjigj një përdoruesi në rrjetin social X i cili pyeti se kur “AI Mode” do të bëhej modaliteti i parazgjedhur. Përgjigja e tij e shkurtër ishte: “së shpejti”, transmeton Telegrafi.
Edhe pse ky mesazh ka shkaktuar shumë spekulime, zëvendëspresidenti i Google Search, Robby Stein, u përpoq ta qetësonte publikun duke thënë se kompania aktualisht po punon për ta bërë modalitetin AI lehtësisht të disponueshëm për këdo që e dëshiron, por se nuk duhet “të lexohet shumë midis rreshtave”.
AI Mode është një skedë e veçantë brenda Google Search që përdor modelin Gemini të inteligjencës artificiale për t’u ofruar përdoruesve përgjigje të drejtpërdrejta, koncize dhe bisedore, pa pasur nevojë të klikojnë në lidhje të shumta të ndryshme.
