Ushtarët e caktuar në Komandën Rajonale-Lindje (RC-E), pjesë e misionit të Forcës së Kosovës (KFOR) të udhëhequr nga NATO, morën pjesë në një ushtrim për reagim ndaj zjarrit dhe trajnim mjekësor të zhvilluar së bashku me agjencitë partnere lokale në Kampin Bondsteel.
Përmes një postimi në rrjetin social Facebook bëhet e ditur se trajnimi bashkoi personelin e KFOR-it, zjarrfikësit dhe ndihmësit mjekësorë emergjentë për të përmirësuar koordinimin, për të rritur ndërveprimin dhe për të forcuar aftësitë e reagimit ndaj emergjencave.
Tutje thuhet se përmes këtij trajnimi, pjesëmarrësit ndërtojnë marrëdhënie profesionale dhe përsosin procedurat që mbështesin mbrojtjen e njerëzve, infrastrukturës dhe shërbimeve kritike. Përpjekje të tilla demonstrojnë angazhimin e vazhdueshëm të KFOR-it për të punuar së bashku me institucionet dhe partnerët vendas për të kontribuar në një mjedis të sigurt për të gjithë njerëzit që jetojnë në Kosovë.
“KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit që jetojnë në Kosovë dhe lirinë e lëvizjes, në çdo kohë dhe në mënyrë të paanshme. KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet e tyre përkatëse si reagues të sigurisë” thuhet mes tjerash në njoftim.
