Negociatat mes Kosovës dhe Serbisë në nivelin teknik, nëse jo çdo ditë, duhet të zhvillohen çdo javë.
Kjo, sipas ambasadorit të Suedisë në Kosovë, Jonas Westerlund, i cili, në një intervistë për Info Magazine në Klan Kosova, tha se vendi i tij rekomandon që të përshpejtohen negociatat.
“Rekomandimi im si një shtet anëtar i BE-së është që ne duhet të përshpejtojmë negociatat teknike mes dy vendeve. Që do të thotë se ju duhet të keni, nëse jo çdo ditë, atëherë çdo javë negociata teknike në çështje të caktuara siç është për shembull Menaxhimi i Integruar i Kufirit. Mendoj se kjo do të ishte këshilla nga ana ime për Brukselin”, tha Westerlund.
Ndërkaq, për sa i përket sulmit terrorist në Banjskë, ambasadori suedez tha se duhet të ndodhë ekstradimi i të akuzuarve nga Beogradi në Prishtinë.
“Sikur Bashkimi Evropian, ashtu edhe Sekretari i Përgjithshëm i NATO-s kanë thënë se ne e mbështesim ekstradimin e atyre që qëndrojnë prapa Banjskës”, deklaroi i pari i Suedisë në Kosovë.
Duke u ndalur te marrëdhëniet mes Kosovës dhe Suedisë, Westerlund tha se ato janë “të shkëlqyer bilaterale”.
“Ne jemi donatori i katërt më i madh bilateral për Kosovën. Ne kemi një diasporë të madhe në Suedi, kemi shumë kompani suedeze që po fillojnë të operojnë në Kosovë, enkas në sektorin e ICT-së”.
“Jam shumë i lumtur që Suedia u shndërrua në qendër e start-upeve financiarë në Evropë. Kur vjen puna te kryeqytetet financiare, në vitin 2025 kishte më shumë start-ups në Stokholm sesa në Cyrih, Londër e Frankfurt. Dhe unë mendoj se ne mund të punojmë së bashku me Kosovën në këtë aspekt”, theksoi ambasadori i Suedisë në Kosovë, Jonas Westerlund.
