Ankesa e një shtetasi nga Kosova, i cili pretendonte se i ishte vendosur një masë administrative në kundërshtim me ligjin, në vlerën prej 6 mijë lekësh (50 euro), i ka kushtuar me arrest dhe me vend pune një punonjësi të policisë në këtë qytet. Krahas kësaj, ka zbuluar edhe një skemë të re zhvatjeje ndaj kosovarëve dhe shtetasve të huaj.
Një ditë më parë, oficerë të Policisë Gjyqësore të Drejtorisë Rajonale të Agjencisë Mbikëqyrjes Policore kanë ndaluar inspektorin E.Q., nën dyshimin për veprën penale “Vjedhja e kryer duke shpërdoruar detyrën” dhe “Falsifikimi i dokumenteve”.
Denoncuesi, një drejtues automjeti nga Kosova, ka sqaruar në ankesën e tij se ky punonjës i policisë i kishte dhënë shumën prej 50 euro për shlyerjen e kësaj mase administrative, ndërkohë që në fletë-gjobën e dorëzuar në polici ai kishte shënuar shumën e 1 mijë lekëve, diku gjashtëfish më pak.
“Nga veprimet hetimore të kryera pas sekuestrimit të bllokut të masave admistrative të punonjësit të policisë E.Q., rezulton se masa administrative me numrin përkatës të serisë është me vlerë 1 mijë lekë, gjë e cila tregon mospërputhje me fletën e masës administrative të paraqitur nga denoncuesi”, thuhet në njoftimin e Policisë në Korça.
Hetimet kanë zbuluar se rasti nuk është i izoluar.
“Në vazhdim të këqyrjes së blloqeve të administruar nga punonjësi i policisë, konstatohen raste të ngjashme edhe për shtetas të tjerë, kryesisht nga Kosova, për të cilat po bashkëpunohet me Prokurorinë pranë Gjykatës së Shkallës së Parë Pogradec, me qëllim dokumentimin e plotë. Lidhur me këtë rast, Drejtoria Rajonale e AMP Korçë ka referuar materialet në Prokurorinë pranë Gjykatës së Shkallës së Parë Pogradec për veprime të mëtejshme”, thuhet në njoftim. “AMP mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast të abuzimit apo shkeljes së ligjit nga ana e punonjësve të Policisë së Shtetit, duke telefonuar në numrin e gjelbër 0800 9090”.
Problemet e këtilla me të cilat përballen kosovarët në rrugët e Shqipërisë, nuk janë të reja.
Pesë vjet më parë, Këshilli për Mbrojtjen e të Drejtave e të Lirive të Njeriut në Kosovë ka reaguar ndaj autoriteteve të trafikut rrugor në Shqipëri, duke thënë se autoritetet e trafikut rrugor të Shqipërisë ndaj qytetarëve të Kosovës i zbatojnë standardet e dyfishta: nëse kanë mundësi në vend të fletë-gjobave u marrin para si ryshfet dhe në rast se nuk marrin, atëherë u vendosin gjobat e larta dhe i konfiskojnë dokumentet.
Kuvendi i Shqipërisë ka votuar në vitin 2019 një amendament që ndryshon sanksionet për drejtuesit e automjeteve që kanë leje drejtimi të lëshuar nga një vend i huaj, perfshirë edhe ata nga Kosova. Amendamenti i propozuar ka sjellë dyfishimin e gjobave për drejtuesit e këtyre automjeteve në këmbim të mospezullimit të patentë-shoferit.
Opozita asokohe kërkoi të rishihet në tërësi Kodi Rrugor i Shqipërisë, me qëllimin për të krijuar lehtësira për qytetarët dhe e kishte cilësuar dyfishimin e gjobës si masë represive për qytetarët nga Kosova, por edhe për shtetasit e tjerë të huaj, apo që kanë një leje drejtimi të lëshuar nga një vend i huaj.
Por, sipas mazhorancës, ky ndryshim thjeshtëzon procedurat administrative për shtetasit që kanë leje drejtimi për automjetet të lëshuara nga shtetet e huaja, në rastet kur ata shkelin rregullat e qarkullimit rrugor.
