Proteinat janë të rëndësishme për ndërtimin dhe ruajtjen e muskujve, forcimin e kockave, prodhimin e hormoneve dhe rikuperimin e trupit.
Sasia e proteinave që i nevojitet një gruaje çdo ditë varet nga pesha trupore, mosha, aktiviteti fizik dhe gjendja shëndetësore, shkruan Health.
Rekomandimi i përgjithshëm për të rriturit është rreth 0.8 gramë proteina për kilogram të peshës trupore në ditë. Për gratë, kjo përkthehet në afërsisht 46 gramë në ditë, megjithëse nevojat ndryshojnë nga një person te tjetri.
Gratë që ushtrohen rregullisht mund të kenë nevojë për 1.2 deri në 1.6 gramë proteina për kilogram të peshës trupore. Nevojat mund të rriten edhe gjatë shtatzënisë, në moshë të shtyrë dhe në rrethana të caktuara shëndetësore.
Marrja e mjaftueshme e proteinave ndihmon në ruajtjen e masës muskulore dhe shëndetit të kockave. Kjo është veçanërisht e rëndësishme gjatë dhe pas menopauzës, kur ndryshimet hormonale mund të ndikojnë në muskuj dhe në dendësinë e kockave.
Në të kundërt, marrja e pamjaftueshme e proteinave mund të kontribuojë në dobësimin e muskujve dhe të rrisë rrezikun për rrëzime e fraktura, veçanërisht te gratë e moshuara.
Për të siguruar sasinë e nevojshme, rekomandohet që proteinat të përfshihen në vaktet e përditshme. Burime të mira janë vezët, qumështi, kosi grek, peshku, mishi pa shumë yndyrë, fasulet, thjerrëzat, qiqrat dhe tofu.
Megjithatë, konsumimi i sasive të tepërta nuk sjell domosdoshmërisht përfitime shtesë. Personat me sëmundje të veshkave duhet të konsultohen me mjekun për sasinë e përshtatshme të proteinave.
Një dietë e larmishme, e kombinuar me ushtrime të forcës, ndihmon në ruajtjen e muskujve dhe të shëndetit të kockave.
