Dita e sotme ishte e shënuar jo vetëm për Kosovën, por për të gjithë shqiptarët kudo në botë, pasi xhudistja Nora Gjakova fitoi medaljen e artë në Lojërat Olimpike që po zhvillohen në Tokio.
Por Radio Televizioni Shqiptar, kanali publik që mbahet me lekët e taksapaguesve dhe që deklaroi se do të japë Lojërat Olimpike nuk e pa të arsyeshme për ta transmetuar në asnjërin prej tre kanaleve të dedikuara.
Madje gjatë kohës që xhudistja nga Kosova po luftonte në gjysmëfinale, RTSH jepte sporte të tjera nga Lojërat Olimpike, ndërsa kur po zhvillohej finalja e madhe Radio Televizioni Shqiptar në kanalin RTSH Sport transmetonte ndeshjen e basketbollit mes Serbisë dhe Kanadasë në kategorinë e grave.
Rëndësia e kësaj ndeshjeje të basketbollit është e pamohueshme, por duke qenë dy vende vëllazërore ndoshta Shqipëria do të duhej të solidarizohej me Kosovën.
