Bella Hadid ka ndarë me ndjekësit një tjetër rrëfim prekës mbi sfidat që po përjeton me shëndetin e saj, duke publikuar në Instagram disa fotografi ku shfaqet e përlotur dhe dukshëm e lodhur nga gjendja fizike.
Modelja 29-vjeçare zbuloi se po kalon një periudhë të rënduar për shkak të sëmundjes Lyme, me të cilën është diagnostikuar prej vitesh. Ajo tregoi se, pavarësisht orëve të gjata të gjumit, pushimit të vazhdueshëm dhe ndjekjes së çdo trajtimi të mundshëm, simptomat nuk po qetësohen.
Në një nga postimet, Hadid shkroi me ironi se nga dëshpërimi “i ka vënë vetes edhe 12 diagnoza të tjera”, duke reflektuar frustrimin që po përjeton përballë kësaj beteje të vazhdueshme.
Ajo përshkroi edhe vështirësitë e përditshme, duke treguar se nuk kishte fuqi as të dilte për një shëtitje, ndërsa vetëm ecja deri në kuzhinë i shkaktonte mungesë fryme. Megjithatë, modelja u përpoq të gjente pak humor në mesin e kësaj situate të vështirë.
“Arrita të bëja një dush pa më rënë të fikët… kjo u ndje si një arritje shumë e madhe për mua sot, kështu që mbase dikush mund të më dërgojë një biskotë apo diçka”, shkroi ajo, duke prekur mijëra ndjekës që i shprehën mbështetje në komentet e postimit.
