Leon Avdullahu mund të jetë njëri prej emrave më të kërkuar në afatin kalimtar të verës së ardhshme, pasi interesimi për mesfushorin kosovar po rritet. Sipas mediumit gjerman Fussballtransfers, Atlético Madridi e ka futur në listën e objektivave për sezonin e ardhshëm.
Skuadra e Diego Simeones është në kërkim të një mesfushori defensiv, i cili është taktikisht i zgjuar dhe i fortë në fazën mbrojtëse. Në këtë profil përshtatet Avdullahu, i cili po zhvillon paraqitje të mira me Hoffenheimin në Bundesligë.
Interesimi i klubit madrilen nuk është i ri. Atletico kishte tentuar ta transferonte futbollistin kosovar edhe gjatë verës së kaluar, por Hoffenheimi kishte refuzuar ta lironte, pasi e konsideronte atë një pjesë të rëndësishme të projektit të skuadrës.
Hoffenheimi kishte paguar 8 milionë euro në vitin 2025 për ta transferuar Avdullahun nga Baseli, klubi ku ai ishte zhvilluar si futbollist. Që nga atëherë, mesfushori është shndërruar në një element të rëndësishëm të skuadrës gjermane dhe një prej lojtarëve që ka ndihmuar në përmirësimin e rezultateve të saj.
Deri më tani, Avdullahu ka regjistruar 48 paraqitje zyrtare me Hoffenheimin, duke realizuar një gol dhe duke dhënë një asistim. Ai ka kontratë me klubin gjerman deri në vitin 2031, çka mund ta bëjë të vështirë arritjen e një marrëveshjeje për transferimin e tij.
Basel po ashtu shpreson në shitje, pasi do të përfitonte jashtëzakonisht shumë nga një tjetër transferim i talentit të tyre vendas falë kompensimit të stërvitjes dhe një klauzole të rishitjes e vënë në kontratë.
Sipas raportimit, përveç Avdullahut, Atlético Madridi po shqyrton edhe emra të tjerë për mesfushën, përfshirë Stefan Dzodicin e Almerias dhe Mikel Merinon e Arsenalit.
Një transferim i mundshëm në Madrid do të përfaqësonte një hap të madh në karrierën e 22-vjeçarit kosovar, i cili mund të kalojë nga Bundesliga në njërin prej klubeve më të njohura të futbollit evropian.
